L'Aministrazion provinziela ie daniëura mpenieda a miuré si servijes, a rënder l azes a chisc l plu scëmpl che la va y a smendré la burocrazia al minim. Co pa? Scemplifican, cunlian y tulan demez la pruzedures aministratives. Per chësc fin iel l ann passà unì metù a jì n pruzes de otimisazion nterna, ulache la direzions y l personal dependënt à purtà dant 1.300 prupostes cuncretes de miuramënt. Chësta prupostes vën al mumënt lauredes ora.

N ucajion dla scumenciadiva SCEMPLIFICON DEBERIEDA pudova pona nce i zitadins, la dites y l'assoziazions dla Provinzia autonoma de Bulsan prejenté si prupostes cuncretes dai 5 de mei nchin ai 31 de lugio 2025, per cuntribuì ala costruzion de n'Aministrazion provinziela a mesura de duc.

I resultac

Chi à pa tëut pert?

La scumenciadiva SEMPLIFICHION DEBERIEDA à abù gran nteres: de ndut 402 prupostes cuncretes ie unides purtedes dant da 258 partezipanc (danter chisc 212 privac de uni età y 46 dites y urganisazions de plu setores).

De gra de cuer a duta la persones che à partezipà per l cuntribut de gran valor per crië na aministrazion efizienta y a mesura de duc.

Ciunes fova pa la prupostes?

La prupostes purtedes dant tol ite na gran varietà de tematiches, che n possa mëter adum te chësta macroarees:

• Aministrazion (81 prupostes)
• Frabiché y abité (44 prupostes)
• Sanità (43 prupostes)
• Lëur y economia (32 prupostes)
• Mubiltà (27 prupostes)
• Istruzion y furmazion (24 prupostes)
• Familia, afares soziei y cumenanza (23 prupostes)
• Nfurmatica y digitalisazion (23 prupostes)

La prupostes reverda plu suvënz chisc argumënc spezifics:

• Scemplificazion dl'asseniazion de lëures publics
• Mplementazion dl prinzip Once only per mëter ite i dac
• Adurvanza dla rujeneda saurida ti ac aministratifs
• Veles digiteles
• Scemplificazion dl azes al lëur provinziel
• Scemplificazion dla detlarazion de purtenienza ala grupa linguistica
• Scemplificazion dl portal di servijes myCivis
• Scemplificazions tl ciamp dl EEVE/ISEE

Co vala pa inant?

La prupostes unirà śën analisedes dai ufizies provinziei cumpetënc y, sce l ie na valutazion positiva, realisedes var per var. La nfurmazions mpurtantes unirà publichedes sun chësta plata internet man che la prupostes unirà valutedes.